الفسيخ حرام..

شم النسيم اللي فات "من كام يوم يعني"

مجموعة كبيرة من المواطنين يحتشدون في مركب بدأ في التحرك في قلب النيل، على أنغام موسيقى شعبية صاخبة، يبدأ صاحب المركب في جمع الأجرة..
صاحب المركب: يلّا يا حضرات.. 3 جنيه للنفر بالصلاة على النبي..

يرد أب يصطحب أربعة من أبنائه: كتير يا أبويا.. ده إحنا في مناسبة يعني هنجيب فلوس للفسحة ولا فلوس للفسيخ.. ده أنا ماجبتش مراتي معانا عشان أوفر، قلت لها تتفسحي معايا ولا تاكلي فسيخ.. اختارت الفسيخ!
صاحب المركب: عندها حق.. أكيد الفسيخ أحلى من الفسحة معاك يا جدي! هع هع هع! إيدك بقى على 15 جنيه!

يقول أحمد الطالب الجامعي الذي يجلس إلى جوار الأب: بس ما تعرفش إن فيه فتوى حرمت أكل الفسيخ؟
ينظر له الأب في حدة وهو يقول: كمان الفسيخ طلع حرام؟! والله أنا خايف بعد كده يقولوا إن أكل الفول والطعمية حرام وإن الكشري هو بس اللي حلال!
أحمد: والله الكلام ده جد مش هزار.. والفتوى دي قالها إمبارح رئيس لجنة الفتوى السابق في الأزهر.. والراجل عنده منطق.. شايف إن الفسيخ حرام عشان "ريحته الوحشة" وطريقة تمليحه اللي أحيانا بتؤدي إلى تعفنه!
الأب: يا سلام؟ يعني أهالينا اللي بياكلوا الفسيخ من 1000 سنة وأكتر كلهم داخلين النار!

المراكبي: والله أنا شايف إنه ما ينفعش ندخّل الدين كده في حاجات زي دي.. يعني الطبيعي إن الناس تشغّل مخها.. وتعرف الصح من الغلط من غير ما تنتظر فتوى.. ارمي الهلب يا واد خلينا نريح هنا شوية!
أحمد: هنريح هنا في قلب النيل؟! ما علينا.. عموما أنا بأختلف معاك.. المنطق بيقول إننا ما ينفعش نتحرك في أي حاجة إلا بأخذ رأي الدين.. الدين داخل في كل تفاصيل حياتنا فلازم نتحرك في النور بتاعه.

الأب وهو يتصل بالموبايل: أيوه يا أم أنور.. كلتي الفسيخ كله؟ مش قلت لك سيبي لي واحدة طيب! سلام سلام!.. بتتكلم إزاي يا ابني.. الدين بتاعنا حاجة كبيرة قوي فمش كل تفصيلة صغيرة كده نحشرها وندخلها فيه.. وهو فيه نص بيحرم الفسيخ؟
أحمد: لأ طبعا..

الأب: يبقى خلاص.. كل واحد حر يشغّل مخه.. مش لازم تكون فيه وصاية دايما عليّ من حد طالما الأمر بتاعي..

المراكبي: وبعدين القاعدة بتقول: لا ضرر ولا ضرار.. ومش ممكن عشان فيه حد مش بيحب ريحة الفسيخ يحرمه!
أحمد: بس أهو في كل سنة بنقرأ عن كام واحد جاله تسمم من الفسيخ.. يبقى تحريمه أحسن طبعا.

الأب: أيوه كام واحد بيتسمم من كام مليون واحد بياكلوا الفسيخ؟ معنى كده إن الناس لازم تدقق بس وهي بتشتري.. مش تحرم عليهم الفسيخ.. طب والرنجة بقى حلال ولا إيه نظامها؟!
المراكبي: ما أعرفش.. لكن اللي أعرفه إنك اديتني 14 جنيه بس مش 15.. فين الجنيه يا عم الحاج!

كلت الفسيخ أو هربت من ريحته!

بتحبه أو بتقول يا فكيك أول ما تشوفه جاي ماشي على أول الشارع -أيوه الفسيخ بيمشي اليومين دول!-

بتشتريه لوالدتك أو بتدخل معاها في خناقة كل سنة "عشان صحتك يا ماما بلاش"

الوضع دلوقتى مش حكايه فتوى اصدرت لتخالف عادات وتقاليد نتوارثها

لو رجعنا لمبدا تانى كان المفروض ان يصدر ان شم النسيم حرام لانها بدعه وكل بدعه ضلاله وكل ضلاله فى النار

كل المواسم والمراسم غير عيد الفطر المبارك وعيد الاضحى كلهم حرام
حتى مولد النبى صلى الله عليه وسلم احنا بنحتفل بيه باشكال كتيره

الرسول صلى الله عليه وسلم قال لا تجعلوا من مولدى عيدا

يعنى احنا كده بنخالف الرسول

لكن بخصوص فتوى الاكل

الفسيخ اصله السمك البورى
والسمك شىء ميت حلله الله لنا
قال الرسول صلى الله عليه وسلم

حلل لكم دموان وميتتان

الدموان الكبد والطحال

والميتتان الحوت والجراد

صدق الرسول صلى الله عليه وسلم
وكان يقصد بالحوت اللى هو السمك بكل فصائله
مايجيش بقى المفتى يسيب المصدر نفسه ومايحرمهوش ويحرم الاكل

يعنى زى مابيقولوا

يجى على الهايفه ويتصدر


تسلم ايدك
تقبل مرورى

بص ياعم كرومبو
قال المصطفى صلى الله عليه وسلم (احل لكم ميتتان ودمان فاما الميتتان الحوت والجراد واما الدمان الكبد والطحال) صدق رسول الله صلى الله عليه وسلم ده بالنسبه لموضوع الفسيخ
اما بالنسبه لموضوع ان استنى فتوى القران ماترك كبيره ولا صغيره الا واحصاها يعنى انا مش مستنى فتوى وسيدنا النبى قال استفتى قلبك وان افتوك الناس