مدد قصيدة جمال بخيت

باموت يا مصر المتباعة
باموت يا مصر المنهوبة
شمسك تسير عكس الساعه
والعين على العَمَى مغصوبة
الصفر خيم على زمنك
وعروق رقابتك مطلوبة
على الحدود قتلوا ولادك
وتقفى ساكته .. ومرعوبة
مدد يا هـيكل .. يا ضميرى
مـدد يا كامـل يا زهيــــرى
مـدد يا قاضى يا خضيرى
مـدد يا مِـكى يا زكريا
يا جورج اسحاق
يا مسيرى
يا بسطويسى .. يا حرية
مـدد يا أجمل أعصايرى
مدد يا قلب الوطن الحر
مدد يا سيرة عوض المر
مدد يا ندهة كمال خليل
مدد يا حلم ندى القصاص
مدد يا خط رؤوف عياد
شقيان وماشى بكل عناد
مدد يا قمح سكينه فؤاد
مــدد يا بنت يا مصـريه
يا جمـيله يا أخت بهيه
مدد يا شِعر العـاميه
مدد يا صاحبى اللي قاسمته
مدد يا عِلم اتعلمته
من عم عودة وصدقى عزيز
شباب لبس وش العواجيز
مــدد يا سورة إخلاصي
مدد يا خويا وتاج راسي
يا معصراوي .. يا حسيني
مـدد يا ست نهى الزيني
يـا فجر صبّح على عـينى
صالح ما بين نفسى وبينى
وقاللي دي الست القاضيه
كشفت عن الألوان زيفها
وخلت الورده الزاهيه
تعيش على وش خريفها
مدد يا فادى يا اسكندر
على خطى محمد الاشقر
على طريق ابن أبو عيطه
جمّـع مظاهراتنا مشاعـر
و يغير من الهتافات شاعر
يحفظ ديوان لأمـين الديب
يلاقى شعب كـأنه أديب
عندك فى شِعره
بلاد .. تقاسيم
عندك حجازى
وعمرو سليم
والنكته بوزاره تعليم
باموت يا مصر المتباعة
باموت يا مصر المنهوبة
شمسك تسير عكس الساعة
والعين عالعمى مغصوبة
مدد يا وائل ويا عيسى
مصر الشباب عالترويسة
فضحوا الوحوش السعرانة
أكلتنا جامع وكنيسة
مدد يا وائل ويا عيسى
مدد يا غـد ويا كفاية
أبو العلا .. ماضى.. معايا
في طريق ما يعرفش نهاية
الا بميلاد مصر الحرة
الا بميلادنا ...ومـددنا
وكرامة تفضل لولادنا
مدد يا آية فى سورة العصر
مدد يا تمثال نهضة مصر
مدد يا فيلم صلاح الدين
مدد يا حماد ...ويا حمدين
متصدرين باسم الامة
للمجزره ..وقوانين سكاكين
للمبخره.....وقوانين زنازين
باموت يا مصر ومخنـوقلك
عبد الحميد شتا مشنوقلك
ميت عشان فرصته بتضيع
لولاد كلاب و ولاد جرابيع
ثابتين على عرش فشلهم
نايمين على وش عسلهم
سرقوا الرغيف والحريه
سرقوا السياسة الخارجيه
إدوا الحرامى....بنوك الوز
و إدوله مصنع طعمه يلذ
و ادوله فندق لجل يهـز
وادوا الحديد لإولاد العـز
والبورصه محشورة فى جيبهم
والسد لو كنا نسيبهم
بميته و بكهربته
بكره هايدخل فى نصيبهم
مدد يا صوت عبد الناصر
مدد يا شيخ حسن البنا
نفسى فى شىء قبل الجنة
يقوم بأه حزب وطنا
ونقضى ع اللى مسرطنا
الليل يتوب عن كوابيسه
وأشوف فى مصر رئيس سابق
والجى ميكونش وريثه
مدد يا يحيى حسين يا أمين
بيخصخصوا الهوا والميادين
بيمصمصوا الناس والفدادين
باعوا الطريق الصحراوى
وباعوا احلام الجامعه
وهتكوا عرض الشرقاوى
وعملوا بيصلوا الجمعه
باعوا وباعوا وهايبيعوا
شيخ الوطن ولا رضيعه
وباعوا صوت عبد الباسط
وشهر يوليه واسابيعه
باموت يا مصر المتباعة
باموت يا مصر المنهوبة
شمسك تسير عكس الساعة
والعين عالعمى مغصوبة
هاتى المدد يا منى الشاذلى
لا تخافى يوم ولا تتنازلى
وصورى مصنع غزلى
ف الاعتصام العمالى
انا كنت رب العوم ..مالى ؟؟
مقتول غريق ويا آمالى
آدى الغريق....
والقاتل فين ؟؟مدد ياعبدالغنى يا حسين
صورلى مصر المحتارة
صورلى غرقى العبارة
مالهومش حد ينجيهم
غرقوا بحاضرهم وماضيهم
البحر مفيهوش قشاية
والملح نار جوه عيونهم
وعيون بلدهم نساية
ومنارة الشط تخونهم
باموت يا مصر الغرقانة
باموت يا مصر المنكوبة
طعم الحياة كلها اهانة
وانتى عالنيل مصلوبه
_ _ _ _
مدد يا بنت الايه يا آلاء
يا حصه الوطن المشتاق
الاولى فى علم التغيير
بشرى..بألوان الطباشير
راسمه العلم فى الصفحه أسير
وبتعلنى بقلب الموجوع
ان الوطن ميادين ونجوع
تعبان من الحرمان والجوع
عين المراقب ..غفلانة
عن العيون الانسانة
بنت الخمستاشر احساس
بنت الخمستاشر تفكير
بنت الخمساتشر غنوة
على وتر علم التعبير
عين الملاحظ بتلاحظ
ان العقول جوه قوالب
مفيهمش خنساء ولا جاحظ
عين المصحح مبهوتة
من الخطوط المفلوتة
المُصحِح : يا نهار مقندل مش فايت
مش دى الاجابه المظبوطة
اضبط يا ناظر واتصرف
الناظر: يا نهار مزفت ومدوحس
مش دى الاجابه العلميه
شيلونى هيلا يا افنديه
نوصل لحد المديرية
المدير: أنا مش مدير فى القصه دى
وعيني مش شايفه قصادى
سؤالنا مفيهوش أمريكا
والبنت هى المحقوقة
وضرورى..قطعا مزقوقة
يا اما حزب الله فى لبنان
يا اما سوريا او طهران
او المقاومه العراقية
قوموا بينا نعملها قضية
(ومن الادارة التعليمى الى الادارة الامنية )..
آدى سين سؤال
انطقى يا آلاء
منين عرفتى أساس الداء ؟
مين بلغك ان المأمور
بيبوس فى رجلين الاعداء ؟
مين جندك للشيوعية
ولبسك اخوانجيه ؟
انا ؟!
أنا بنت مصر الحرية
يا ديول ديول الحرامية
سرقتوا فرحتى بشبابى
سرقتوا بهجتى بكتابى
سرقتوا من لغتى الاولى
سطور فى كشكول التعبير
خُدُوا منى صفر على غباكوا
وألف صفر لكل جبان
ما ذاكرش درسه عن الاوطان
بتتبنى بفكر وايمان
بتتبنى بدفتر مواليد
فيه الشهيد قبل الفنان
_ _ _ _ _
شكر واجب:فلنشكر كل مخبر
مبلغ عن آلاء
من أول المصحح
للناظر.. للوزير
كشفوا معدن ولادى
وبلّغوا الحبابيب...
وبلّغوا الاعادى
ان النشيد مازال
هو نشيد.. بلادى

حلوه جداااااااااااا

تسلمي

» سر جمال الرجل وسر جمال المرأة
» فيلم بخيت و عديلة هالو امريكا
» فيلم بخيت و عديلة 2 الجردل و الكنكة
» قصيدة حب بالصعيدى
» قصيدة الاحزان